27 Dec 2013

الريادية: إيمان الشاذلي ,تغيير مسار

تغيير مسار…

انا إيمان الشاذلى, سنة تانية فى كلية تجارة English جامعة عين شمس. عايزة اقولكو اصلا ان دى كانت اخر كلية انا ممكن اتخيل انى ادخلها. طول عمرى بحلم انى ادخل كلية هندسة و كل شوية كان حلمى بيكبر انى اطلع مهندسة و اشتغل و اعمل شركة و ابقى مشهورة عالميا و حجات كده, لدرجة انى كنت بدأت اجيب حجات ليها علاقة بهندسة زى المساطر و الاقلام و كده. بس الحقيقة انا مكنتش بعمل حاجة عشان حلمى ده يتحقق, انا مكنتش بذاكر وانا فى ثانوية عامة.

قبل الدراسة بأسبوع انا كنت لسه مش عارفة هتقبل فى كليتى ولا لأ. كنت مشوشة و تايهه, مش شايفة مستقبل مش عارفة هروح فين و مش عارفة هبقى ايه. عرفت ان فى نشاط طلابى فى الجامعة اسمو SSP بيدى محاضرات عن ال soft skills و بيمهد الطلاب الجدد للحياة الجامعية. و روحت. قد ايه المحاضرات دى أثرت فيا. عرفت انى مش لازم اكون مهندسة عشان ابقى ناجحة, انا هنجح فى اى مكان و اى ظروف انا فيها. عرفت انى ممكن ابذل مجهود كبير عشان اوصل لحاجة انا عايزاها و فى الاخر ممكن موصلش, بس لو حاولت تانى اكيد هوصل. انا اشتكرت فى SSP و كنت سعيدة ب دا جدا. بغض النظر ان دى كانت اول مرة اسمع فيها كلمة “نشاط طلابى”,بس غيّر فيا كتير و خلانى ابوص للامور بطريقة تانيه.

انا تجربتى مش كبيرة اوى فى الانشطة الطلابية بحكم انى بقالى سنة واحدة بس فى الجامعة, بس فى حاجة لفتت نظرى فى معظم الحجات اللى شوفتها, معظم الشغل بيكون باللغة الانجليزية. ليه كل حاجة بالإنجليزى!! انا مقتنعة جدا بان المفروض نكون بنعرف نتكلم English و بطلاقة كمان, بس دا مش معناه اننا نستخدمو فى حياتنا بالطريقة دى. الinterviews, الtasks حتى ال MOMs بالEnglish !! انا مش شايفة ان دى حاجة كويسة (خير الامور الوسط). طب ليه مبنستخدمش اللغة العربية فى الحجات دى كلها ! ليه الانجليزى اقرب لنا من العربى !! و ليه محدش شايف ان دا مش صح! كل دى اسئلة بتدور فى دماغى و مش لاقيالها تبرير.

كلنا اتغيرنا اما دخلنا فى انشطة طلابية حتى لو كانت صغيرة. مجرد الاحتكاك باشخاص جديدة و مختلفة دا بيديك خبرة و بيوسع مداركك. بتعرف انت هتعمل ايه امتى و ازاى. بتعرف اكتر عن نفسك و قدراتك و بالتالى بتزود ثقتك فى نفسك. بتعرف الجانب العملى من حياتك هيبقى عامل ازاى و انت هتتصرف ازاى فى المواقف الصعبة. بتعرف حجات كتير اوى انت مش متخيل هتفيدك ازاى, باختصار انت “بتنضج” .

انا حكيتلكو عن الحاجة اللى كان نفسى تحصل. و حكيتلكو ازاى عرفت النشاط الطلابى و ازاى اتغيرت بعد كده, عن الحجات اللى شايفاها مش صح و عايزة اغيرها فى يوم م الايام, و ازاى استفدت من الانشطة الطلابية و ازاى أثرت فيا. بوصو, كل واحد له حكاية و تجارب, المهم بس اننا نستفيد من تجاربنا دى و منكررش الغلط. جملة “منكررش الغلط” دى ممكن تعدى من قدامنا كل يوم و منفهمهاش صح. اخر حاجة عايزة اقولها, متستناش حد يعملك حاجة عشان مش هيعملها زى منتا عايز. و بس كده …