05 Dec 2013

الريادية رضوي حمدي, لله رب العالمين

 

تجربتي مع الأنشطه الطلابيه

” لله رب العالمين ” شعار اتعلمته من عملي بالأنشطه الطلابيه و بقى جزء من شخصيتي. أنا رضوى طالبه في بكالريوس حاسبات كلية الهندسه بشبرا و ان شاء الله السنه دي تكون الأخيره كطالبه في الكليه. زمان لما كنت صغيره قبل ما أدخل الكليه كان كل حلمي اني أدخل كلية الهندسه وأكون مهندسه شاطره و أكون سبب في رِفعة بلدي. لما حققت حلمي و دخلت الكليه اكتشفت ان الدراسه و المذاكره مش هما بس اللي مهمين لا ده في كمان معرفة و مواكبة كل جديد خصوصا ان مجال دراستي في تطور مستمر. أُعجبت بالأنشطه الموجوده في الكليه و خصوصا ال IEEE, عجبتني فكرة ان زمايل ليا عرفوا عن موضوع معين أو حاجه جديده و قد ايه مهمه فينظموا Events و Workshops عشان يعرفوا زمايلهم عن الموضوع, مش بس كده, كمان يعملوا دعايا كثير جداً عشان يعرفوك بأهمية المواضيع اللي هيقدموها و ازاي هتستفيد. كل ده بدافع نشر عِلم عندهم حبوا يعرفوا كل الناس عنها, عشان ممكن أي واحد بسببهم عرف عن حاجه جديده و تفوق فيها و في النهايه يكون سبب في ان بلده تبقى أعلى و أعلى و انه يكون حاجه كبيره. كل ده بسبب مجموعه من الناس عملوا كل ده و هدفهم انه يكون

 لله رب العالمين.

كنت من المحظوظين اللي اشتركوا في ال IEEE Student Branch في الكليه و دي كانت بدايتي مع الأنشطه الطلابيه و فكرة العمل التطوعي, و كنت ساعتها في سنه أولى هندسه و كانت سنه في منتهى الروعه اتعلمت منها كثير و من الناس اللي معايا في النشاط أكثر, و الأجمل من ده كله اني شاركت في يوم الهندسه المصري, في اليوم ده لقيت ناس كثير من كل منطقه في مصر و بيتعاونوا و شعارهم “لله رب العالمين”. في السنه اللي بعدها بقيت رئيسة للجنة ال HR داخل النشاط و زاد حماسي للشغل و اني أقدم لزمايلي أكثر و أكثر و الحمد لله نظمنا Events و نجحنا في تحقيق هدفنا في السنه دي. و السنه اللي فاتت بقيت نائب لرئيس النشاط و من مميزات السنه دي اني اتعرفت على ناس أكثر و انضم للنشاط ناس جديده كانوا خير اضافه لفريق العمل اتعلمت منهم أكثر ما هما اتعلموا مني. من أحلى الحاجات اللي حبيتها في الIEEE الروح الحلوه الطيبه اللي بيتعامل الناس بيها مع بعضهم في وقت الشغل و غير الشغل بنبقى أصحاب. كله بيعمل حاجه بيحبها و مؤمن بيها, الكل عارف انه في النهايه

لله رب العالمين.

أي منظمه موجوده, نجاحها دائما بيكون نتيجه للتنظيم القوَي لفريق العمل و التفاهم ما بينهم و ايمان أفراد المنظمه باللي بيعملوه و بيقدموه. نفس الكلام ينطبق على الأنشطه الطلابيه و استيعاب فكرة العمل الجماعي او الTeam Work و تطبيقها في الشغل. يعني ايه Team Work ؟؟ يعني احنا مجموعه أو فريق من الناس يشتركوا في تنفيذ مهمه أو عمل معين بشكل جماعي متعاونين و كلنا لينا هدف واحد اننا ننفذ المهمه دي على أكمل وجه و يهمنا في النهايه نجاحها .في وجهة نظري ان نجاح أي نشاط قائم على الفكره دي ان مفيش حاجه اسمها “أنا” في “احنا” الكل لازم بفتكر حاجه واحده بس اننا هدفنا نجاح النشاط , نجاحنا احنا مش نجاحي أنا, نجاح عملنا مش نجاح عملي أنا. كل هدفنا من النجاح ده اننا نكون وصَلنا للناس الفكره و نجحنا في ده و في نية كل واحد فينا انه

لله رب العالمين.

أي شغل تيجي تعمله أكيد هتلاقي فيه تحديات بتواجهك و تديك خبره و بيسبب ان النجاح يبقى أكبر. من التحديات و المشاكل اللي قابلتها في شغلي في ال  IEEE .  فمن المشاكل دي مشاكل اداريه مع الكليه مثلا أو الموظفين في رعاية الشباب في حجز القاعة أو الوقت اللي مطلوبه فيه أو الميزانية اللي محتاجينها, و دي كنا بنحلها اننا نحاول نوصل لادارة الكليه فكرتنا و هدفنا من النشاط و اننا مش غرضنا أي مصالح شخصيه, طبعا ده بيبقى مؤكد من شغلنا اللي عملناه قبل كده. و من التحديات الكبيره تحفيز أفراد فريقك على العمل أكثر و اتمام عملهم على أكمل وجه, ممكن مواجهة التحدي ده بعمل جوائز شهريه مثلا لأفضل عضو في النشاط, ممكن بردو تنظيم رحلات للخروج من الجو الروتيني و خلق روح طيبه بين أفراد الفريق, و الأهم من أي حاجه نشر الهدف العام و هو ان كل ده

لله رب العالمين.

الدعايا مهمه جدا لأي حدث بتنظمه في النشاط اللي انت فيه لانك هتعرف الناس بفعاليات اليوم و الموضوع اللي هيتناقش في الEvent ده, وساعات الدعايا عن الموضوع اللي هيتم مناقشته تبقى مهمه لو مش معروف أوي, و الدعايا مهمه كمان لانك هتشد الناس اللي مهتمين بموضوع الEvent . كأنك بتعرف الناس بيك و انك بتقدم اللي هما مهتمين بيه و انك مهتم انك تفيدهم. في مشاكل طارئه طبعا ممكن تواجهك خلال الEvent أو الWork Shop, يعني كل حاجه متخطط لها تمام بس حصل ظروف أيا كانت ممكن تأثر على اليوم, مثلا الSpeaker اتأخر أو مش هيقدر يجي لظروف يبقى لازم دائما يكون عندك Plan B يعني لو اتأخرالSpeaker يبقى عندك خطه بديله, مثلا تقدم فقرات متنوعه زي حل فوازير أو أي شو متوفر و يكون في الخطه. و لو حصل ظرف و الSpeaker مش جاي خالص تحاول تشوف Speaker ثاني مكانه أو تتصرف بأي شكل, المهم يبقى في مرونه و المشاكل دي عادي و بتحصل كثير المهم متأثرش علينا بالسلب عشان كله

لله رب العالمين.

و من الحاجات المهمه في أي Event تُبدي اهتمامك بالزوار و تعمل على راحتهم ممكن تبقى حاجات بسيطه تحصل تضايقهم بس يبقى ليها تأثير سلبي ملحوظ على الEvent . و مهم جدا تأخذ Feedback عن نشاطك و عن أي حدث تنظمه و تضعه في اعتبارك عند تنظيم أي حدث في المستقبل و تحاول تعالج المشاكل دي. و بردو مهم جدا طريقة استقبالك للSpeakers و دكاترة الكليه لازم تظهر ترحيبك بيهم و تتعامل معاهم على انهم ضيوف كليتك و نجوم الحدث اللي انت منظمه.

أتمنى جميع الأنشطه الطلابيه التى اشتركت فيها في جامعتي و غيرها خارج الجامعه اللي هدفها افادة الناس و العمل التطوعي تنجح في أهدافها كلها و مصر تبقى أحسن و أحسن. و الأهم اني أرضي

الله رب العالمين.